العب يانظيف

العب يا نظيف!

١١/ ٣/ ٢٠٠٩
العب يا نظيف خليك حريف
والشعب جعان مش لاقى رغيف
العب يا نظيف دى الكورة اجوان
وكشف المستور أهو بكرة يبان
العب يا نظيف خليك مبسوط
وأهو شعب يموت وبكرة يفوت
العب يا نظيف وبلاها تغيير
بلا كادر وشنطة وأكل حمير
العب يا نظيف إن شالله تعيش
ويا رب الشعب يروح ما يجيش
العب يا نظيف خليك فى الصورة
والناس من الظلم تموت مقهورة
العب يا نظيف دا اللعب جميل
وكيد الشعب أبو دم تقيل
العب يا نظيف وجيب اجوان
وشمس الحق آهى بكرة تبان
العب يا نظيف معدش كلام
غير إن إحنا نقول والله حرام
والله حرام حرااااام

مصطفى السرتى

العب يانظيف
تعليق عمر تـاريخ ١١/٣/٢٠٠٩ ٣٢:١٧




واشمعنا نظيف يابو دم خفيف ما الشعب ياروحى طول عمره نظيف من ايام مينا وايام احمس طول عمر الشعب ياسيدى نظيف بيفطر فول وعشاه الفول بسوس وبدود وهو كله يفوت . اشمعنا نظيف مش يبقى لعيب ومعاه العز والشعب ضعيف انا نفسى الاقى ياسيدى رغيف من غير صرصار وبدون مسمار دانا كنت ابروزه واعمل عيد والنبى تتلهى يابو دم خفيف ده نظيف يوم جانا كان يوم عيد لو غرق الشعب فى يوم ما تخاف ده شعبك شاطر فى التجديف وشد لحافى ياشعب ونام فى النوم ها تلاقى حلم جديد جايز تصحا فى يوم من النوم لاتلاقى حكومة ولاحتى نظيف