يا حكومة الجيب نظيف
وآآآآآآآآآآآه يا أحمد نظيف
يا مربي لنا الخفيف
في شتانا وفي الخريف
ارحم صرخة أنيني
من خصخصة الرغيف
وارمي السلام يا عيني
ع الحر وع الشريف
لو قلت تعض قلبي
قلبي أنا أصلا ضعيف
هاتكون ظالم لسنة
لو يوم عضت رغيف
وأكيد هاتكون بريئة
دا الجيب أصبح نظيف
لو سعدك يوم زمانك
قول للدكتور نظيف
قول له بلغة الإشارة
يا مربي لي الخفيف
مش بالبشاميل باحلم
ولا بالشتا والصيف
في الصف أنا نايم أحلم
أحضن لي أنا كام رغيف
آخد لي معاهم صورة
واتغطى وأنام خفيف
ما احنا في زمن الرغيف
أصبح حر وظريف
بيذل الكون بحاله
واللي مجوع عياله
هايموت وآه يا لطيف
والسكر داب في سعره
دا بصلنا آهو شد شعره
وكاتبنا آهو قال في شعره
ع الحلو حمادة عزو
أصبح غرقان في وزه
يا حديد وآه يالطيف
طيرت العقل والله
الله يا أحمد نظيف
تموينا والبطاقة
ونكد فوق كل طاقة
وهنا مواطن شريف
اتغطى ونام خفيف
جوة الأحلام تلاقي
صورة أجمل رغيف
وعليه م اللحمة حتة
هاتعوم على أحلى فتة
والفرخة دي هانخصامها
بجناحها لفوق تطير
والرز ما يلزموشي
أصبح أكل الأمير
والعدس ما بشربوشي
والفول ما بيرحموشي
أحسن أشرب عصير
هاتغطى وأنام خفيف
والله يا أحمد نظيف
باحلم لك حلم لكن
جدا حلو وظريف
يا سلام لو يوم تنام
زي مواطن خفيف
تعرف بالحق إنه
شعبك محتاج رغيف
موضوع: شعبك محتاج رغيف